راولپنڈی میں غیرت کے نام پر قتل کی گئی خاتون کے کیس میں نئے انکشافات سامنے آ گئے ہیں۔ سی پی او راولپنڈی خالد ہمدانی نے جیو نیوز کے پروگرام “جیو پاکستان” میں گفتگو کرتے ہوئے بتایا کہ لڑکی کی غیر فطری موت کی اطلاع پولیس کو اُسی روز موصول ہوگئی تھی۔ تاہم مقتولہ کے اہلخانہ نے پولیس کی توجہ اصل واقعے سے ہٹانے کے لیے تین دن بعد اغوا کی جھوٹی رپورٹ درج کروائی۔
قتل کے بعد فوری تدفین اور نشان مٹانے کی کوشش
سی پی او کے مطابق ملزمان نے خاتون کو گھر میں قتل کرنے کے بعد اُسی رات شدید بارش میں دفن کیا اور قبر کا نشان تک مٹا دیا گیا تاکہ شواہد ضائع ہو جائیں۔ پولیس نے باریک بینی سے تفتیش کرتے ہوئے قتل کا سراغ لگایا۔
گمراہ کن بیانیہ: اغوا اور پہلی شادی کا ڈرامہ
ملزمان نے شک ہونے پر پولیس کی توجہ ہٹانے کے لیے پہلی شادی، اغوا اور دیگر معاملات کا ذکر کرنا شروع کیا، لیکن پولیس نے انہیں بے نقاب کر دیا۔ سی پی او نے واضح کیا کہ یہ سیدھا سیدھا قتل کا کیس ہے، جسے غیرت کے نام پر چھپانے کی کوشش کی گئی۔
گرفتاریاں اور اہم پیش رفت
واقعہ 17 اور 18 جولائی کی درمیانی شب راولپنڈی کے پیر ودھائی تھانے کی حدود میں پیش آیا، جہاں ایک شادی شدہ خاتون کو گلا دبا کر قتل کر دیا گیا تھا۔ خاتون کی راتوں رات تدفین بھی کر دی گئی تھی۔ پولیس نے اب تک کیس میں 8 افراد کو گرفتار کرلیا ہے، جبکہ مقتولہ کا دوسرا شوہر عثمان بھی گزشتہ رات پولیس کو خود گرفتاری دے چکا ہے۔
اہل خانہ کا موقف
عثمان کے والد محمد الیاس کا کہنا ہے کہ مقتولہ کے گھر والے اُسے رخصتی کا کہہ کر ساتھ لے گئے تھے، اور دو دن بعد اطلاع ملی کہ اسے قتل کر دیا گیا ہے۔