پاکستانی اداکارہ صبا قمر طبیعت کی خرابی کے دو ہفتے بعد دوبارہ اپنے کام پر واپس آگئی ہیں
یکم اگست کو شوٹنگ کے دوران صبا قمر کو اچانک دل میں تکلیف محسوس ہوئی تھی جس کے بعد انہیں فوری طور پر اسپتال منتقل کیا گیا اور ان کی انجیوگرافی بھی کی گئی۔ اس واقعے نے ان کے مداحوں کو سخت تشویش میں مبتلا کر دیا تھا۔
اداکارہ نے بعد ازاں انسٹاگرام پر بتایا تھا کہ یہ مسائل زیادہ تر ذہنی دباؤ اور صدمات کے باعث سامنے آئے۔ انہوں نے اپنے مداحوں کو نصیحت کی تھی کہ تکلیف دہ حالات کا سامنا کرنے پر جذبات چھپانے کے بجائے ان کا اظہار کریں۔
اب صبا قمر نے ایک نئی اسٹوری شیئر کرتے ہوئے بتایا کہ وہ صحت میں بہتری کے بعد اپنے نئے پروجیکٹ پر کام کا آغاز کر رہی ہیں۔ تاہم انہوں نے واضح کیا کہ مکمل صحت یاب ہونے میں ابھی کچھ وقت لگے گا۔
صبا قمر نے اپنے مداحوں کی دعاؤں اور محبت پر شکریہ بھی ادا کیا، لیکن اپنے آنے والے پراجیکٹ کی تفصیلات ظاہر نہیں کیں۔