سلمان خان کی وائرل ویڈیو
پاک بھارت کشیدگی کے تناظر میں بالی ووڈ کے سپر اسٹار سلمان خان کی ایک پرانی ویڈیو سوشل میڈیا پر تیزی سے وائرل ہو رہی ہے، جس میں وہ پاکستان کے حق میں بات کرتے دکھائی دے رہے ہیں۔ ویڈیو میں وہ کہتے ہیں کہ پاکستان خود دہشت گردی کا شکار ملک ہے، اور کسی بھی حملے کے بعد فوری الزام تراشی دانشمندی نہیں بلکہ اصل مسائل کا حل تلاش کرنا چاہیے۔
اسلام اور دہشتگردی سے متعلق مؤقف
سلمان خان نے ویڈیو میں واضح الفاظ میں کہا کہ اسلام کسی بے گناہ کی جان لینے کی اجازت نہیں دیتا اور نہ ہی دہشتگردی کی تعلیم دیتا ہے۔ انہوں نے مذہب کی اصل روح کو اجاگر کرتے ہوئے دہشتگردی کو عالمی مسئلہ قرار دیا اور ہر قوم کو اس کے خلاف متحد ہونے کی تلقین کی۔
سیز فائر اور انسٹاگرام پوسٹ
یہ ویڈیو ایسے وقت سامنے آئی ہے جب پہلگام حملے کے بعد دونوں ممالک میں کشیدگی بڑھی اور بعد ازاں سیز فائر کا اعلان ہوا۔ سیز فائر کے بعد سلمان خان نے انسٹاگرام پر ایک شکرانے کا پیغام بھی شیئر کیا تھا، جسے کچھ دیر بعد ڈیلیٹ کر دیا گیا۔ اس اقدام نے نئی قیاس آرائیوں کو جنم دیا ہے کہ آیا ان پر کسی قسم کا دباؤ تھا۔
سوشل میڈیا پر ردعمل
ویڈیو وائرل ہونے کے بعد سوشل میڈیا پر ملا جلا ردعمل دیکھنے میں آ رہا ہے۔ پاکستانی صارفین نے سلمان خان کی جرات اور غیرجانبدار مؤقف کو سراہا جبکہ بھارتی شدت پسند حلقوں کی جانب سے انہیں غدار اور ملک دشمن قرار دیا جا رہا ہے۔ اس تنازع نے ایک بار پھر فنکاروں کی آزادی اظہار رائے پر سوالیہ نشان لگا دیا ہے۔
یہ بھی پڑھیں:سلمان خان کو جنگ بندی کی حمایت پر تنقید کے باعث ٹوئٹ ہٹانا پڑگئی