چینی طلبا پر سخت امریکی پالیسی کا آغاز
امریکا نے چینی طلبا پر نئی سخت ویزا پالیسی کا اعلان کر دیا ہے، جس کے تحت چینی کمیونسٹ پارٹی سے وابستہ یا اہم شعبوں میں تعلیم حاصل کرنے والے طلبا کے ویزے منسوخ کیے جائیں گے۔ امریکی وزیر خارجہ مارکو روبیو نے واضح کیا ہے کہ امریکا قومی سلامتی کے خدشات کے پیش نظر ان طلبا پر نظر رکھے گا جن کے تعلقات چین کی ریاستی اداروں سے ہیں۔
ویزا پالیسی میں بڑی تبدیلیاں اور سخت چیکنگ
امریکی محکمہ خارجہ کے مطابق چین اور ہانگ کانگ سے آنے والی نئی ویزا درخواستوں کے لیے معیار مزید سخت کیا جائے گا، اور ان کی جانچ پڑتال زیادہ تفصیل سے کی جائے گی۔ اس عمل میں سوشل میڈیا پروفائلز، سابقہ سرگرمیوں اور دیگر سیکیورٹی پہلوؤں کا بغور جائزہ لیا جائے گا۔
سفارت خانوں کو اپائنٹمنٹس روکنے کی ہدایت
رپورٹ کے مطابق صدر ٹرمپ کی انتظامیہ نے تمام امریکی سفارت خانوں کو ہدایت کی ہے کہ طلبا کے ویزوں کے لیے نئی اپائنٹمنٹس کا شیڈول بند کر دیں۔ یہ قدم اس لیے اُٹھایا گیا ہے تاکہ ویزا درخواست دہندگان کی سوشل میڈیا جانچ کے عمل کو مزید وسعت دی جا سکے۔ تاہم، جن کی اپائنٹمنٹس پہلے سے طے ہو چکی ہیں، وہ معمول کے مطابق جاری رہیں گی۔
چین سے تجارتی تعلقات میں بھی سختی
اس فیصلے کے ساتھ ساتھ امریکا نے اپنی کمپنیوں کو چین کو مصنوعات فروخت کرنے سے بھی روک دیا ہے، جو دونوں ممالک کے درمیان کشیدگی کو مزید بڑھا سکتا ہے۔ یہ اقدامات امریکی قومی سلامتی اور داخلی پالیسیوں کے تحت کیے جا رہے ہیں۔
یہ بھی پڑھیں:چین کسی ملک کو پاکستان کی سرحدوں یا خود مختاری کو پامال کرنے کی اجازت نہیں دے گا