یومِ تکبیر کی تاریخی اہمیت
پاکستان کے ایٹمی دھماکوں کو آج 27 برس مکمل ہوچکے ہیں۔ 28 مئی 1998 کو پاکستان نے بھارت کے 5 ایٹمی دھماکوں کا بھرپور جواب دیتے ہوئے بلوچستان کے مقام چاغی میں 5 کامیاب ایٹمی تجربات کیے، جن کے بعد ملک کو پہلی اسلامی ایٹمی قوت بننے کا اعزاز حاصل ہوا۔ ان دھماکوں نے خطے میں طاقت کا توازن بحال کیا اور پاکستان کے دفاع کو ناقابلِ تسخیر بنایا۔
نواز شریف کے دور میں ایٹمی طاقت بننے کا فیصلہ
یہ تاریخی فیصلہ اُس وقت کے وزیراعظم نواز شریف کے دور حکومت میں کیا گیا۔ بھارت کے اشتعال انگیز اقدامات اور ایٹمی دھماکوں کے بعد پاکستان کے لیے دفاعی طاقت کا مظاہرہ ناگزیر ہوگیا تھا۔ اس کے نتیجے میں 28 مئی کو پاکستان نے جوہری تجربات کر کے قومی سلامتی کا پیغام دیا۔
یومِ تکبیر کی تقریبات اور قومی جوش
ہر سال 28 مئی کو یومِ تکبیر کے طور پر منایا جاتا ہے۔ اس موقع پر ملک بھر میں عام تعطیل ہوتی ہے اور مختلف تقریبات منعقد کی جاتی ہیں جن میں وطن کے دفاع کے لیے قربانیاں دینے والے شہداء اور سائنسدانوں کو خراجِ تحسین پیش کیا جاتا ہے۔
مسلح افواج کا پیغام
چیئرمین جوائنٹ چیفس آف اسٹاف کمیٹی اور تمام سروسز چیفس نے پاکستانی قوم کو یومِ تکبیر کی مبارکباد دیتے ہوئے کہا ہے کہ یہ دن 1998 کی اُس عظیم قربانی کی یاد دلاتا ہے جب پاکستان ایک ایٹمی قوت بن کر ابھرا۔ ان کا کہنا ہے کہ پاکستان کی اسٹریٹجک صلاحیت عوامی امنگوں کی نمائندہ ہے، اور مسلح افواج وطنِ عزیز کے دفاع کے لیے ہر لمحہ تیار اور پُرعزم ہیں۔
یہ بھی پڑھیں:علامہ اقبال: شاعرِ مشرق، مفکرِ پاکستان