ہنگو: اغوا پولیس اہلکار بازیاب، تینوں کو بحفاظت واپس لایا گیا

ہنگو: اغوا پولیس اہلکار بازیاب ہو گئے ہیں۔ اتوار کی رات شاہ عالم پیر پہاڑی کی پولیس چوکی پر حملے کے دوران اغوا کیے گئے تین پولیس اہلکاروں کو بحفاظت واپس لا لیا گیا ہے۔ ڈسٹرکٹ پولیس افسر صلاح الدین کنڈی کے مطابق تینوں اہلکاروں کی بازیابی ضلعی پولیس، قبائلی عمائدین اور ضلعی انتظامیہ کی مشترکہ کوششوں سے ممکن ہوئی۔

اتوار کی رات دہشت گردوں نے شاہ عالم پیر پہاڑی کی چوکی پر دھاوا بول کر فائرنگ کی تھی، جس میں کانسٹیبل فیروز علی شہید ہو گئے تھے جبکہ تین اہلکاروں کو اغوا کر کے سمانا پہاڑی سلسلے کی طرف خانانو کوٹ لے جایا گیا تھا۔ پولیس اور سیکیورٹی فورسز کی بھاری نفری موقع پر پہنچی، دہشت گردوں سے فائرنگ کا تبادلہ ہوا اور پولیس نے چوکی کا کنٹرول دوبارہ حاصل کر کے اغوا شدہ اہلکاروں کی تلاش شروع کر دی تھی۔

شہید کانسٹیبل کی نماز جنازہ
شہید کانسٹیبل فیروز علی کی نماز جنازہ ہنگو پولیس لائنز میں ادا کی گئی، جس میں سینئر پولیس افسران، ریسکیو اہلکاروں اور ضلعی انتظامیہ کے ارکان نے شرکت کی اور شہید کو خراج عقیدت پیش کیا۔ ان کی میت آبائی گاؤں ابراہیم زئی روانہ کر دی گئی۔

صوبے میں پولیس پر حملوں کا سلسلہ
خیبر پختونخوا میں پولیس پر حملوں کا سلسلہ جاری ہے۔ ستمبر میں کوہاٹ پولیس لائنز پر حملے میں 15 پولیس اہلکاروں سمیت 23 افراد شہید ہوئے تھے، جبکہ ستمبر کے آخر میں ٹانک میں تین ٹریفک پولیس اہلکاروں کو شہید کر دیا گیا تھا۔ حملے کی ذمہ داری ابھی تک کسی گروہ نے قبول نہیں کی ہے۔