گورنر راج کے بعد تحریک انصاف کی کور کمیٹی کا ہنگامی اجلاس طلب، شفیع جان کی عوام کو پشاور پہنچنے کی کال
خیبر پختونخوا میں ایمرجنسی اور گورنر راج کے نفاذ کے بعد پاکستان تحریک انصاف نے اپنی آئندہ کی حکمت عملی طے کرنے کے لیے کور کمیٹی کا ہنگامی اجلاس طلب کر لیا ہے۔ اجلاس وزیراعلیٰ ہاؤس پشاور میں ہوگا جس میں ملک کی سیاسی صورتحال اور گورنر راج کے بعد کی صورتحال پر تفصیلی غور کیا جائے گا۔
کور کمیٹی میں اہم فیصلے متوقع
پارٹی ذرائع کے مطابق اجلاس میں وفاقی حکومت کے فیصلے کے خلاف قانونی اور سیاسی محاذ پر لائحہ عمل طے کیا جائے گا۔ پی ٹی آئی خیبر پختونخوا کے سیکرٹری اطلاعات شوکت یوسفزئی نے کہا ہے کہ ایمرجنسی کا نفاذ وفاقی حکومت کا سب سے بڑا احمقانہ فیصلہ ہوگا، یہ کسی صورت مسئلے کا حل نہیں اور نہ ہی اس سے موجودہ بحران ٹل سکتا ہے۔
شفیع جان کی پشاور پہنچنے کی کال
ادھر پی ٹی آئی رہنما شفیع جان نے صوبے کی عوام کو پشاور پہنچنے کی کال دے دی ہے۔ پارٹی قیادت کا مؤقف ہے کہ معاملات کا حل اب بھی ممکن ہے، اگر حکومت پی ٹی آئی کے مطالبات تسلیم کرے اور عمران خان سے ملاقات کرا دے تو تمام مسائل کا حل نکل سکتا ہے۔ پی ٹی آئی رہنماؤں نے حکومت کو مولانا فضل الرحمان کی ثالثی سے فائدہ اٹھانے کا مشورہ بھی دیا ہے۔
