لاہور میں بسنت 2027: ڈپٹی کمشنر کی تین روزہ پتنگ بازی کی منظوری، 12 سے 14 مارچ کی تاریخیں مقرر
Basant kite-flying in Pakistan (Islamabad, 2016). Photo: Haseeb Ahmad Farooqi / Wikimedia Commons (CC BY-SA 4.0)
لاہور: ڈپٹی کمشنر لاہور نے جمعے کو باقاعدہ نوٹیفکیشن جاری کر دیا — بسنت 2027 تین روزہ میلے کے طور پر 12 سے 14 مارچ تک منائی جائے گی۔ نوٹیفکیشن کے مطابق لاہور ضلع بھر میں (مقرر کردہ ممنوعہ علاقوں کے سوا) ان تین دنوں میں پتنگ بازی کی اجازت ہو گی، اور یہ اہتمام پنجاب ریگولیشن آف کائٹ فلائنگ رولز 2025 کے تحت چلایا جائے گا۔
تیاری سے فروخت تک کی ونڈوز
نوٹیفکیشن میں تیاری کا شیڈول بھی طے کر دیا گیا ہے۔ پتنگ اور ڈور کی تیاری 5 ستمبر 2026 سے 14 مارچ 2027 تک ہو سکے گی — مگر صرف ای بز ایپ کے ذریعے درست ڈیجیٹل رجسٹریشن رکھنے والے مینوفیکچررز کے لیے۔ خرید و فروخت، نقل و حمل اور ذخیرہ اندوزی یکم فروری سے 14 مارچ 2027 تک، جبکہ عوامی فروخت 10 فروری سے 14 مارچ تک صرف رجسٹرڈ فروخت کنندگان کے ذریعے ہو گی۔ اسٹاک اور سیل کا ریکارڈ رکھنا لازمی ہے۔
کتنی بڑی پتنگ، کون سی ڈور
پتنگوں کے سائز بھی مقرر کر دیے گئے: پتانگ زیادہ سے زیادہ 35 انچ چوڑی اور 30 انچ لمبی (زیادہ سے زیادہ ساڑھے چار گٹھی)، گڈا 40 انچ چوڑا اور 34 انچ لمبا (زیادہ سے زیادہ ڈیڑھ توا) ہو سکتا ہے۔ ڈور صرف کپاس کی، پنّے پر لپٹی، زیادہ سے زیادہ 9 تار اور گنتی کم از کم 28 — اس پر صرف 350 میش یا اس سے باریک شیشے کے پاؤڈر والا مانجھا لگایا جا سکتا ہے۔ دھاتی تاریں، نائلون اور ہر خطرناک ڈور پر مکمل پابندی ہے، اور موٹر سائیکلوں پر حفاظتی روڈ لگنا لازمی قرار دیا گیا ہے۔
انیس برس بعد واپسی کا پس منظر
یہ لاہور کی بسنت کا باضابطہ دوسرا سال ہے — پتنگ بازی پر لگی تقریباً دو دہائیوں کی پابندی کے بعد فروری 2026 میں بسنت واپس آئی تھی، جب 24 دسمبر 2025 کو پنجاب ریگولیشن آف کائٹ فلائنگ بل منظور ہوا تھا۔ وزیر اعلیٰ مریم نواز نے اگست میں 2027 کی تاریخوں کا اعلان کیا تھا، جبکہ ہوم سیکرٹری ڈاکٹر احمد جاوید قاضی کی صدارت میں ہونے والے اجلاس میں چھتوں کے حفاظتی اصول بھی طے ہوئے — 31 دسمبر 2026 تک چھتوں کی دیواریں کم از کم ساڑھے تین فٹ بلند کرنا ہوں گی۔
