موسم سرما کی پہلی برفباری: شمالی پہاڑوں میں برف، سیاحوں کو احتیاط کی ہدایت

محکمہ موسمیات نے ملک کے شمالی پہاڑی علاقوں میں موسم سرما کی پہلی برفباری کی پیش گوئی کرتے ہوئے کہا ہے کہ 10 سے 14 نومبر کے دوران بالائی خیبر پختونخوا، گلگت بلتستان اور کشمیر کے بلند مقامات پر برف پڑے گی، جبکہ کئی علاقوں میں بارش اور گرج چمک کے ساتھ ژالہ باری کا بھی امکان ہے۔

محکمے کی جانب سے منگل کو جاری کردہ ایڈوائزری میں سیاحوں اور مقامی افراد کو پہاڑی علاقوں میں سفر کے دوران احتیاط برتنے کی ہدایت کی گئی ہے۔ محکمے کا کہنا ہے کہ بارش اور برف سے سڑکیں پھسلن کا شکار ہو سکتی ہیں اور سفر میں خلل پڑ سکتا ہے، اس لیے سیاح گرم کپڑے، خوراک اور ہنگامی سامان ساتھ رکھیں اور روانگی سے قبل موسم اور سڑکوں کی صورتحال ضرور معلوم کریں۔

بارش کا سلسلہ 12 نومبر کو شدت اختیار کرے گا

محکمے کے مطابق مغربی ہواؤں کا نیا نظام منگل کی شام ملک کے شمال مغربی حصوں میں داخل ہوا تھا، اور یہ 12 نومبر کو مزید شدت اختیار کرے گا۔ اسلام آباد، راولپنڈی، مری، گلیات، ایبٹ آباد، مانسہرہ اور سوات سمیت خیبر پختونخوا کے کئی اضلاع میں تیز ہواؤں، گرج چمک اور بارش کا امکان ہے، جبکہ پہاڑی چوٹیوں پر برفباری ہو سکتی ہے۔

پنجاب ڈیزاسٹر مینجمنٹ اتھارٹی نے بھی صوبے کے بیشتر اضلاع کے لیے 10 سے 13 نومبر تک بارش کا الرٹ جاری کر رکھا ہے۔ محکمہ موسمیات کے مطابق بارش سے متاثرہ علاقوں میں دن کا درجہ حرارت 2 سے 4 ڈگری سینٹی گریڈ تک گر سکتا ہے، اور بارش کا سلسلہ ختم ہونے کے بعد میدانی علاقوں میں دھند بھی پڑ سکتی ہے۔