بلوچستان میں دو کارروائیاں: کچھی اور خاران میں 17 دہشت گرد ہلاک، سپاہی حکمت اللہ شہید

راولپنڈی: بلوچستان آپریشنز میں سیکیورٹی فورسز نے کچھی اور خاران میں دو الگ الگ کارروائیوں کے دوران 17 دہشت گردوں کو ہلاک کر دیا، جب کہ فائرنگ کے تبادلے میں پاک فوج کا ایک سپاہی شہید ہو گیا۔ پاک فوج کے شعبہ تعلقات عامہ (آئی ایس پی آر) نے منگل کو جاری بیان میں بتایا کہ یہ کارروائیاں یکم نومبر کو خفیہ اطلاعات پر کی گئیں۔
کچھی کے علاقے سنی میں ناکہ بندی کی کوشش ناکام
بیان کے مطابق پہلی کارروائی کچھی ضلع کے علاقے سنی میں ہوئی، جہاں دہشت گرد شہر میں ناکہ بندی قائم کرنے کی کوشش کر رہے تھے۔ سیکیورٹی فورسز نے بروقت کارروائی کر کے یہ کوشش ناکام بنا دی اور فائرنگ کے دوران 10 دہشت گرد مارے گئے۔ ان کے قبضے سے اسلحہ اور گولہ بارود بھی برآمد ہوا۔
خاران میں ٹھکانے پر چھاپہ، شدید فائرنگ
دوسری کارروائی خاران میں کی گئی، جہاں فورسز نے ایک ٹھکانے پر چھاپہ مارا۔ شدید فائرنگ کے تبادلے کے بعد سات دہشت گرد ہلاک ہوئے، جن کے قبضے سے بھی اسلحہ اور گولہ بارود ملا۔ اسی جھڑپ کے دوران 25 سالہ سپاہی حکمت اللہ، جن کا تعلق خیبر پختونخوا کے ضلع کرک سے تھا، بہادری سے لڑتے ہوئے شہید ہو گئے۔
آئی ایس پی آر کے مطابق دونوں کارروائیاں بھارتی سرپرستی میں کام کرنے والے گروہوں فتنہ الہندوستان اور فتنہ الخوارج کے ارکان کی موجودگی کی اطلاعات پر کی گئیں۔ بیان میں کہا گیا کہ عزم استحکام کے تحت انسداد دہشت گردی مہم اسی رفتار سے جاری رہے گی۔
صدر مملکت کا خراج تحسین
صدر آصف علی زرداری نے 17 دہشت گردوں کی ہلاکت پر سیکیورٹی فورسز کو سراہا اور سپاہی حکمت اللہ کی شہادت پر خراج عقیدت پیش کیا۔