وزیراعظم نے دانش آئی ٹی پارک اسلام آباد کا افتتاح کر دیا، 100 سے زائد کمپنیوں اور 8,400 ٹیک ماہرین کے لیے سہولت میسر ہوگی
اسلام آباد: وزیراعظم شہباز شریف نے پاکستان کے پہلے قومی ٹیکنالوجی پارک کا افتتاح کر دیا ہے، جسے اب دانش آئی ٹی پارک کا نام دیا گیا ہے۔ افتتاحی تقریب سے خطاب میں وزیراعظم نے اس منصوبے کو پاکستان کی معاشی ترقی کے لیے ایک اہم سنگ میل قرار دیا۔
یہ پارک 12 منزلہ عمارت پر مشتمل ہے، جس میں 10 منزلیں زمین سے اوپر اور 2 تہہ خانے میں ہیں۔ یہاں 100 سے زائد ٹیکنالوجی کمپنیوں، اسٹارٹ اپس اور چھوٹے و درمیانے درجے کے کاروباروں کے لیے جگہ موجود ہے، جبکہ تقریباً 8,400 ٹیک ماہرین اس سہولت سے مستفید ہو سکیں گے۔ عمارت میں انکیوبیشن سینٹرز، روبوٹکس لیب، جدید ٹیسٹنگ سہولتیں، ٹیئر تھری ڈیٹا سینٹر اور 1,160 گاڑیوں کی پارکنگ بھی موجود ہے۔
یہ منصوبہ کورین ایگزم بینک کی مالی معاونت سے مکمل ہوا، جس کی بنیاد 2017-18 میں رکھی گئی تھی لیکن یہ طویل عرصے تک تعطل کا شکار رہا۔ وزیراعظم نے واضح کیا کہ حکومت خود یہ پارک نہیں چلائے گی بلکہ شفاف بولی کے ذریعے اسے نجی آپریٹر کے حوالے کیا جائے گا۔ انہوں نے کہا کہ اس پارک کے مکمل فعال ہونے کے بعد تمام صوبوں میں اسی طرز کے ٹیکنالوجی پارکس قائم کیے جائیں گے، جبکہ پبلک پرائیویٹ پارٹنرشپ کے تحت گزشتہ دو سالوں میں 65 اضلاع میں چھوٹے ٹیک سینٹرز بھی قائم کیے جا چکے ہیں۔
