اپنی سبسڈی اور خیرات واپس لے لو، کسانوں کو گندم کا ریٹ نہیں مل رہا: سربراہ کسان اتحاد

کسانوں کی محنت رائیگاں، نرخ نہ ملنے پر شدید احتجاج

کسان اتحاد کے سربراہ خالد کھوکھر نے حکومت کی زرعی پالیسیوں پر شدید تنقید کرتے ہوئے کہا ہے کہ کسانوں کو گندم کی فصل کا مناسب ریٹ نہیں دیا جا رہا۔ انہوں نے کہا کہ 15 ارب روپے کی سبسڈی کا اعلان کسانوں کے زخموں پر نمک چھڑکنے کے مترادف ہے۔ ملتان میں پریس کانفرنس کرتے ہوئے خالد کھوکھر نے حکومت کو مخاطب کرتے ہوئے کہا، ’’ہمیں خیرات نہیں، اپنی محنت کی اجرت چاہیے، سبسڈی واپس لے لو۔‘‘

سبسڈی کا وعدہ کسانوں سے مذاق کے مترادف

خالد کھوکھر کا کہنا تھا کہ حکومت نے 15 ارب روپے کا اعلان کر کے کسانوں کے ساتھ مذاق کیا ہے، گندم کی فصل کی لاگت اور مشقت کے مقابلے میں انہیں منصفانہ قیمت نہیں دی جا رہی، جو ملک کی غذائی خود کفالت کو خطرے میں ڈال سکتا ہے۔ ان کا کہنا تھا کہ موسمی تبدیلیوں کی وجہ سے کسانوں کو اربوں روپے کے نقصانات اٹھانے پڑے لیکن اس کا کوئی ازالہ نہیں کیا گیا۔

آئندہ گندم کی کاشت خطرے میں پڑ گئی

کسان اتحاد کے سربراہ نے خبردار کیا کہ اگر حالات ایسے ہی رہے تو اگلے سال گندم کاشت نہیں کی جائے گی۔ خالد کھوکھر نے کہا کہ موجودہ حالات میں کاشت کار شدید ذہنی دباؤ میں ہیں اور بعض کسان خودکشی جیسے انتہائی قدم پر بھی مجبور ہو رہے ہیں۔ کپاس کے کسان بھی سراپا احتجاج ہیں، جنہوں نے حکومت کے کہنے پر کپاس کاشت کی، لیکن اب انہیں بھی مناسب معاوضہ نہیں مل رہا۔

احتجاج کا راستہ اختیار کرنے کا اعلان

خالد کھوکھر نے کہا کہ حکومت کی عدم توجہی کے باعث کسانوں کے پاس احتجاج کے سوا کوئی چارہ نہیں بچا۔ انہوں نے حکومت سے فوری اقدامات کا مطالبہ کیا تاکہ کسانوں کی بقا ممکن ہو اور ملک کی زرعی معیشت کو سہارا دیا جا سکے۔

یہ بھی پڑھیں:مریم نواز کا یکم مئی کو ساڑھے 12 لاکھ افراد میں راشن کارڈ تقسیم کرنے کا اعلان