پی ٹی آئی کی آن لائن میٹنگ کے دوران کنول شوذب کی گفتگو کی ویڈیو لیک

تحریک انصاف کی اندرونی میٹنگ کی ویڈیو لیک، قیادت میں اختلافات نمایاں

پاکستان تحریک انصاف (پی ٹی آئی) کی ایک آن لائن میٹنگ کی ویڈیو لیک ہوگئی ہے جس میں پارٹی رہنما کنول شوذب کی گفتگو نے پارٹی میں جاری اندرونی اختلافات کو منظرِ عام پر لے آیا ہے۔ ویڈیو میں کنول شوذب کو علیمہ خان کے حوالے سے تنقیدی تبصرہ کرتے ہوئے سنا جا سکتا ہے۔

کنول شوذب کی تنقید، علیمہ خان پر براہ راست تنقید

ویڈیو میں کنول شوذب کہتی ہیں کہ انہیں اس وقت بہت افسوس ہوا جب علیمہ خان نے گوہر علی خان سے متعلق کہا ’’کون گوہر؟‘‘ انہوں نے مزید کہا کہ علیمہ خان کو چاہیے کہ یا تو وہ سیاست میں باضابطہ آئیں یا پھر پارٹی کو کمزور کرنے والے بیانات سے اجتناب کریں۔

کنول شوذب کا وضاحتی مؤقف

کنول شوذب نے لیک ہونے والی گفتگو پر ردعمل دیتے ہوئے کہا ہے کہ یہ ویڈیو پی ٹی آئی کی اندرونی میٹنگ سے لیک کی گئی ہے، جسے پبلک کرنا پارٹی کے لیے نقصان دہ ہے۔ انہوں نے کہا کہ پارٹی کے اندرونی معاملات کو عام کرنا ایک تشویشناک عمل ہے، اور اس سے پارٹی کی ساکھ متاثر ہوتی ہے۔

گوہر علی خان اور شہباز شریف سے متعلق وضاحت

انہوں نے مزید وضاحت کرتے ہوئے کہا کہ ان کی گفتگو بیرسٹر گوہر کے خلاف نہیں بلکہ شہباز شریف سے متعلق تھی، تاہم ان کی باتوں کو سیاق و سباق سے ہٹ کر پیش کیا جا رہا ہے۔ کنول شوذب نے دعویٰ کیا کہ ان کے اور بیرسٹر گوہر کے خلاف جان بوجھ کر مہم چلائی جا رہی ہے، اور جسے پارٹی قیادت نے ذمے داری سونپی ہو، اس کا احترام سب پر لازم ہے۔

پارٹی میں دھڑے بندی اور میڈیا لیکس کا بڑھتا رجحان

یہ واقعہ پی ٹی آئی میں موجود دھڑے بندیوں اور اندرونی کشیدگی کو واضح کرتا ہے، جہاں اہم رہنما ایک دوسرے پر تنقید کرتے دکھائی دے رہے ہیں۔ اس ویڈیو لیک نے پارٹی ڈسپلن اور اعتماد کے بحران کو مزید گہرا کر دیا ہے۔

یہ بھی پڑھیں:عمران خان نے شہباز شریف کی مذاکرات کی پیشکش قبول کرلی