پنجاب میں انسدادِ سموگ کارروائیاں تیز، ایک دن میں تین فیکٹریاں اور تین بھٹے سیل

لاہور کی مال روڈ دھند اور سموگ میں (فائل فوٹو) — پنجاب میں انسدادِ سموگ کارروائیاں تیز کر دی گئی ہیں
لاہور: پنجاب حکومت نے صوبے بھر میں انسدادِ سموگ کارروائیاں تیز کر دی ہیں۔ محکمہ ماحولیات کی ٹیموں نے گزشتہ چوبیس گھنٹوں میں 61 صنعتی یونٹوں کی جانچ کی، تین فیکٹریاں سیل کر دیں اور خلاف ورزیوں پر پانچ لاکھ روپے جرمانے عائد کیے۔ اسی دوران 106 اینٹوں کے بھٹوں کی جانچ پڑتال میں تین بھٹے بھی سیل کیے گئے۔
لاہور کی ہوا پیر کی شام تک معتدل درجے پر رہی۔ ماحولیاتی تحفظ ایجنسی کے ڈیش بورڈ کے مطابق ڈی ایچ اے فیز 6 میں ایئر کوالٹی انڈیکس 131، ایگرٹن روڈ پر 130 اور ملتان روڈ پر 124 ریکارڈ کیا گیا، جبکہ جی ٹی روڈ، سفاری پارک اور برکی روڈ پر انڈیکس 110 سے 112 کے درمیان رہا۔ عالمی درجہ بندی میں لاہور اس وقت آٹھویں نمبر پر ہے۔ پنجاب کے دیگر شہروں میں صورتحال کہیں زیادہ خراب ہے — ننکانہ صاحب میں انڈیکس 281 اور جھنگ میں 190 ریکارڈ کیا گیا۔
فصلوں کی باقیات جلانے پر مقدمات
سینئر صوبائی وزیر مریم اورنگزیب نے بتایا کہ صوبے میں دھان کی کٹائی 93.6 فیصد مکمل ہو چکی ہے اور کسانوں میں جدید مشینری کے استعمال کو فروغ دیا جا رہا ہے۔ ان کے مطابق فصل کی باقیات جلانے کے اب تک 402 واقعات رپورٹ ہوئے ہیں، جن پر 222 مقدمات درج کیے گئے اور 31 لاکھ روپے جرمانے عائد ہوئے۔ صرف 13 سے 15 نومبر کے دوران تین مزید ایف آئی آر درج کی گئیں۔
شہریوں کے لیے ہدایات
وزیر نے بتایا کہ زیادہ آلودگی والے علاقوں میں سموگ گنوں سے پانی کا چھڑکاؤ جاری ہے، جبکہ ڈرون، رات کے گشت اور فیلڈ ٹیموں سے آلودگی کے ذرائع پر نظر رکھی جا رہی ہے۔ سات تجارتی کچن اور باربی کیو کی دکانوں کی جانچ میں ایک کو نوٹس جاری کیا گیا اور چھ نے سکشن ہوڈ لگوا لیے۔ مریم اورنگزیب نے کسانوں سے فصلوں کی باقیات نہ جلانے اور شہریوں سے گاڑیوں کا فٹنس سرٹیفکیٹ بنوانے کی اپیل کی، جبکہ بزرگوں، بچوں اور کمزور صحت کے افراد کو باہر نکلنے سے گریز کا مشورہ دیا۔ محکمہ موسمیات کے مطابق منگل کو ملک کے بیشتر علاقوں میں موسم خشک رہے گا، جبکہ لاہور سمیت پنجاب کے کئی اضلاع میں صبح اور رات کے وقت دھند یا سموگ رہنے کا امکان ہے۔



