کراچی سیف سٹی منصوبے کے دوسرے مرحلے کے لیے 5.76 ارب روپے جاری، 2,300 سے زائد کیمرے لگیں گے

File photo: CCTV security cameras mounted on a city street.
کراچی: سندھ کابینہ نے جمعرات کو کراچی سیف سٹی منصوبے کے دوسرے مرحلے کے لیے 5 ارب 76 کروڑ 60 لاکھ روپے جاری کرنے کی منظوری دے دی۔ منصوبے کے تحت شہر بھر میں 2,300 سے زائد جدید کیمرے نصب کیے جائیں گے اور حکومت نے اسے 18 ماہ میں مکمل کرنے کا ہدف مقرر کیا ہے۔
2,300 سے زائد کیمرے، چہرہ شناخت بھی
دوسرے مرحلے میں 870 کیمرے عام نگرانی کے لیے ہوں گے، جبکہ 1,300 کیمروں میں خودکار نمبر پلیٹ شناخت اور چہرہ شناخت کی سہولت ہوگی۔ مزید 80 کیمرے ٹریفک کی نگرانی کے لیے لگائے جائیں گے۔ کابینہ کو بتایا گیا کہ تمام مرحلے مکمل ہونے پر شہر کے 2,000 سے زائد مقامات پر تقریباً 10,000 کیمرے نصب ہوں گے۔
سینئر وزیر شرجیل میمن نے کابینہ اجلاس کے بعد صحافیوں کو بتایا کہ منصوبے کی مجموعی لاگت 9 ارب 40 کروڑ 60 لاکھ روپے ہے جبکہ نیشنل ریڈیو اینڈ ٹیلی کمیونیکیشن کارپوریشن (این آر ٹی سی) کو 8 ارب 87 کروڑ 10 لاکھ روپے کا ٹھیکہ دیا گیا ہے۔ ان کا کہنا تھا کہ معاہدہ حکومت سے حکومت کی بنیاد پر ہو رہا ہے، کسی نجی کمپنی کو ٹھیکہ نہیں دیا گیا۔ وزیر اعلیٰ نے وزیر داخلہ ضیاء الحسن لنجار کو منصوبے کی پیش رفت کی خود نگرانی کی ہدایت کی ہے۔
500 الیکٹرک بسیں بھی منظور
اسی اجلاس میں کراچی کے لیے 500 الیکٹرک بسوں کی منظوری بھی دی گئی۔ 37 ارب 97 کروڑ روپے کے اس منصوبے میں 300 بڑی اور 200 چھوٹی بسیں شامل ہیں، جن کے لیے 125 چارجنگ یونٹ، تین ڈپو اور 499 بس شیلٹر بنیں گے۔ بسیں 17 روٹس پر چلیں گی۔
کابینہ نے گندم کے کاشتکاروں کے لیے 16 ارب 90 کروڑ روپے کے ریلیف پروگرام کی بھی منظوری دی، جس کے تحت صوبے بھر میں 6 لاکھ سے زائد کسانوں کی رجسٹریشن مکمل ہو چکی ہے۔ تھرپارکر اور عمرکوٹ کے خشک سالی سے متاثرہ علاقوں کے لیے امداد بے نظیر انکم سپورٹ پروگرام کے ذریعے 2 لاکھ 73 ہزار 666 مستحقین تک پہنچائی جائے گی۔



