این سی اے لاہور میں پنک ٹوبر آگاہی سیشن، چھاتی کے کینسر کی بروقت تشخیص اور صحت مند طرز زندگی پر زور
لاہور: نیشنل کالج آف آرٹس (این سی اے) نے پنک ربن پاکستان کے اشتراک سے پنک ٹوبر آگاہی سیشن کا اہتمام کیا جس میں چھاتی کے کینسر سے بچاؤ، اس کی بروقت تشخیص اور صحت مند طرز زندگی اپنانے پر زور دیا گیا۔
شاکر علی آڈیٹوریم میں نشست
سیشن کالج کے شاکر علی آڈیٹوریم میں ہوا جس میں اساتذہ، عملے اور طلبہ نے شرکت کی۔ منتظمین کا کہنا تھا کہ نوجوانوں تک یہ پیغام پہنچانا اس لیے ضروری ہے کہ آگاہی ہی وہ پہلا قدم ہے جو کسی خاتون کو بروقت معائنے اور علاج کی طرف لے جاتا ہے۔ این سی اے اور پنک ربن پاکستان نے اس عزم کا اعادہ کیا کہ ایسے سیشنز کے ذریعے آگاہی پھیلانے کا سلسلہ جاری رکھا جائے گا تاکہ لوگ خود آگے بڑھ کر اپنی صحت کے بارے میں قدم اٹھائیں۔
اکتوبر بھر کی مہم کا ایک حصہ
یہ سیشن اسی ملک گیر پنک ٹوبر مہم کا حصہ ہے جس کے تحت پنک ربن پاکستان جامعات سے لے کر کھیل کے میدانوں تک پیغام لے جا رہا ہے۔ تنظیم کے بانی و اعزازی سربراہ عمر آفتاب کا کہنا ہے کہ بروقت تشخیص ہی بقا کی ضمانت ہے اور کسی خاتون کو صرف اس لیے علاج سے محروم نہیں ہونا چاہیے کہ وہ اس کی استطاعت نہیں رکھتی۔ ماہرین کے مطابق ابتدائی مرحلے میں پکڑا گیا چھاتی کا کینسر بڑی حد تک قابل علاج ہوتا ہے، اسی لیے باقاعدہ خود معائنہ اور شبہ ہو تو فوراً ڈاکٹر سے رجوع کرنا ہر خاتون کے لیے ضروری قرار دیا جاتا ہے۔
